Кезінде көпшілік көзайымына айналған үнді актерлары қазір қайда жүр

Ех, шіркін, Болливуд! Сезімге толы әндер мен мың бұралған билер, миллиондаған көрерменнің жүрегін жаулаған актерлар... Ал олардың жұлдызды өмірі қалай басталды? Қазір көрермен көзайымына айналған жұлдыздар қайда жүр? Бұл сұрақтарға KAZ.NUR.KZ Bigpicture.ru сайтына сілтеме жасап жауап береді.

Митхун Чакраборти

«Джими-джими, ача-ача...» Еске түсті ме? Әрине, әйгілі «биші жігіт»!

Үнді киносында жұлдыз болмас бұрын Митхун саяси көтерілістерге қатысып, қамаудан құтылып, косметика таратушы болып жұмыс істеген, алайда оның актерлік таланты жас кезінде-ақ бойынан көрініс бере бастаған. Чакраборти мектептің барлық пьесаларына қатысқан. Кейінірек өмір жолы оны тағы да шығармашылыққа бастап әкелді.

Бозбала шағында туған жерінен кетіп, беделді кино институтына оқуға түсті. Табиғи харизма және келісті сырт келбеті қабылдау комиссиясы мен директорларды өзіне сендіре алды. Көп ұзамай Митхун алғаш рет түсірілім алаңына барады. Расын айтсақ, студенттік кезде жас актерлерге көбінесе эпизодтық рөлдер ғана бұйырады.

«Патша аңшылығы» фильмінде актердің айы оңынан туды. Осы картинадағы рөлі үшін ол Үндістанның "Алтын Лотос" сыйлығына ие болды. Чакраборти өзінің керемет ойынымен ғана емес, қажырлы еңбегімен де елеулі. Оның фильмографиясында 400-ге жуық картина бар.

Әдемі дауыс, жақсы физикалық дайындық және кез келген кейіпкерге айналу қабілеті – Митхунды әлемге әйгілі атаққа айналдырды. Актердің бір қарағанда жанды баурап алатын көзқарасы сан қыздың жүрегін елжіреткені рас. Кинематографиялық бейнесіне қарамастан, актер өмірде үлгілі отбасы мүшесі.

Чакраборти алғашқы жарымен ажырасқан, бірақ бірнеше жылдан кейін ол қайтадан үйленді. Әуесқой актриса Йогита Бали отбасылық бақытты ойлап ,тіпті, мансабынан да бас тартты. Ерлі-зайыптылардың төрт баласы бар, олардың бірін асырап алған. Актер қоқыс жәшігінде жылап жатқан баланы тауып алып, оны ауруханаға жеткізген. Қызды құтқарған соң Митхун және оның әйелі баланы асырап алуға шешім қабылдады.

Актер Үндістандағы ең бай адамдардың бірі болып саналады. Бірнеше жыл бұрын ол өзін бизнесмен ретінде сынап көрді: қонақүй желісі мен футбол командасын сатып алды. Қазір Чакраборти фильмдерде ойнауын жалғастыруда.

Амитабх Баччан

Амитабх – бұл болливудтық Аль Пачино. Харизмалы актер үнділік көрермендердің ғана емес, сонымен бірге біздің отандастарымыздың да жүрегін жаулап алды. Ер адамның шын аты – Шривастав.

Амитабх бала кезінен кино саласындағы мансап туралы армандады. Ол үшін оның бойында сымбаттылық, ырғақ сезінуі, барқыт үні- барлығы бар сияқты көрінетін. Колледжді бітірген соң жағымды баритон даусының арқасында диктор болып жұмысқа тұрады. Бірақ оның басқа туа біткен ерекшеліктері актерлік мансаптың дамуына кедергі келтірді.

Режиссерлер оның имиджін тым қауіпті деп санады. Баччанның анасы жұмыс істеген Индира Гандидің ұсыныс хаты жағдайды ретке келтірді. Кейін оның қатысуымен алғашқы фильм жарық көрді. Бірақ нағыз танымалдылық актерге сәл кейінірек келді. «Ұзақ уақытқа созылған жаза» фильмі Амитабх үшін маңызды сәт болып қана қоймай, оған «ашулы жас» деген лақап ат берді.

Болливудтағы осы фильмнен кейін экшн және детектив сияқты жанрлардың танымалдылығы артып, Амитабх жүздеген жаңа рөлдерге ие болды.

Өкінішке қарай, 1982 жылы актер кино мансабын тоқтатуға мәжбүр болды. «Тасушы» фильмінің түсірілімі кезінде трюктерді өзі орындаған Баччан қатты жарақат алып қалады. Дегенмен, ерік-жігердің арқасында халықтың сүйіктісі бұрынғы қалпына келіп, аяққа тұра алды. Ол кино жолын жалғастырып қана қоймай, жазушы, саясаткер және баяндамашы ретінде де мансабын дамытады.

Баччан үйленген және екі баласы бар.

Хема Малини

Қазақстанда «Зита мен Гита» фильмі туралы естімеген адам жоқ шығар. Сұлу Хема Малини әйгілі егіз апалы-сіңліні ойнады.

Малинидің мансабы бала кезінен басталды. Өнерге деген махаббат қызға фильм продюсері болып жұмыс істеген анасынан беріледі. Би мен музыка Хеманың өмірінің ажырамас бөлігіне айналғаны таңғаларлық жайт емес. Болашақта бұл хобби оның актерлік мансабында маңызды рөл атқарды. Көрермендер иілімділікті, жағымды дауысты және қыз бейнесін жоғары бағалады.

Малинидің қатысуымен алғашқы фильм 1965 жылы жарық көрді. Сол кездің өзінде көптеген сыншы оның би нөмірлерінің кереметі мен күрделілігін атап өтті. Мансаптың басында анасының байланыстары көмектескені өтірік емес, бірақ еңбекқорлығы мен таланты болмаса, ол мұндай танымалдылыққа қол жеткізе алмас еді.

Фильмдегі оның алғашқы серіктестерінің бірі Радж Капур болды. Содан кейін Дхармендрамен біріккен жұмыстар атқарды. Жұлдызды дуэт бірден сәтті төрт фильмде, соның ішінде «Зита мен Гитада» да ойнады. Бұл рөлдер Хеманың актерлік талантын жаңа қырынан ашты.

Әр жаңа жобамен актрисаның даңқы мен бүкіл әлемдегі жанкүйерлерінің сүйіспеншілігі арта түсті. Бірақ 90 жылдардың басында Малини жас кейіпкерлердің рөліне жарамайтынын түсінеді. Хема өзін продюсер және режиссер ретінде сынап көруді шешті.

Қызыққа толы шығармашылық өмірі кемелді жеке өмірімен астасып жатты. Ол жұлдызды әріптесі Дармендраға ғашық болды. Ер адамның үйленуі де, Малинидің басқа актермен араласуы да олардың сезімдеріне кедергі бола алмады. Одақтың негізгі кедергісі Геманың жанұясы еді. Ата-аналар бұл қатынастарға үзілді-кесілді қарсылық танытты.

Бақытты кезең актрисаның ықпалды әкесі қайтыс болғаннан кейін ғана келді. Ғашықтар үйленіп, екі сұлу қызды дүниеге әкелді. Қазір Малини саяси қызметпен айналысады және ұлттық билерден сабақ береді. Ол бос уақытын немерелерімен бірге Мумбайдың жанындағы үлкен отбасылық сарайда өткізеді.

Дхармендра

Актер үнді киносының аңызы болып саналады. Ол қазақ көрермендеріне «Зита мен Гита» фильмінен таныс. Болливудтың болашақ жұлдызы қарапайым шаруа отбасында дүниеге келді. Ата-аналары ұлының актер болуға бел буғанын білгенде қатты қорқады. Бірақ Дхарам Сингх Деол (бұл оның шын аты) шегінуді мүлде ойламайды.

Актер кездейсоқ Filmfare журналындағы шығармашылық байқау жайлы естіп, «Жаңа талант» номинациясына қатысып, жеңіске жетеді. Оның алғашқы түсірілімдерін сәтті деп атауға болмады. Жобалар ақша да, атақ та әкелмеді. Актер «Гүл мен тас» мелодрамасында ойнауға шақырту алады, бірақ сол кездің өзінде ол бас тартып және туған қаласына қайтуға дайын еді. Сол кезден бастап Дармендраның мансабы өрлеу үстінде. Оның қатысуымен түсірілген фильмдер сыншыларды да, қарапайым көрермендерді де қуантты.

Бірақ ол мұнымен тоқтаған жоқ. Ол өзін продюсер ретінде сынап көруді шешті. Сондай-ақ, актер бес жыл бойы парламенттің төменгі палатасындағы Үнді халықтық партиясының өкілі болды.

Саяси мансабын тез аяқтау себептерінің бірі – екінші рет үйлену. Әйгілі сұлу Хема Малиниге деген махаббат баспасөзде көп шу тудырды. Олардың сезімдері экранда жай романнан өмірде де жалғасын тапты. Осылайша, Дармендра үйленді және төрт баланы өсірді. Біраз уақыттан кейін актерлер өздерінің қарым-қатынастарын заңдастырды. Актер бірінші әйелімен ажырасқан жоқ.

Шахрух Хан

«Ханзада» – үнді актерінің аты осылай аударылады. Ол шынымен де Болливудтың нағыз «билеушісі» болды. Тіпті Times журналы оны ең ықпалды кино жұлдыздарының бірі деп санайтын.

Шахрух Үндістанда туып-өскенімен, ұлты бойынша иран. Жас кезінде жігіт әдебиетке, театрға және жүгіруге қызығушылық танытады. Аяқтарының жылдамдығы үшін сыныптастары оны "пошта пойызы" деп атайды. Бір кездері жас жігіт өзінің спортшы ретіндегі мансабы туралы ойлаған, бірақ оның жеңіл атлетикада жолы болмады. Дәрігерлер жас жігіттің жүрек шуылын анықтады.

Шахрух әкесінен 16 жасында айырылады. Хан экономика факультетіне оқуға түскенімен, өзін актерлік тұрғыда сынап көреді. Анасы әрдайым баласын қолдаған, бірақ оның қатысуымен бірде-бір фильм көрмей ерте қайтыс болған.

Белгілі бір уақыттан соң Шахрухтың мансабы жоғарылай бастайды. Бірінші рөл – бірден басты рөл! Бірақ көрермендердің шынайы даңқы мен сүйіспеншілігі «Ұрланбаған келін» премьерасынан кейін ғана көрінеді. Одан кейін «Ом Санти Ом», «Менің атым Кхан», «Өмірде бәрі болады» және т.б. кинохиттер пайда болды. Сонымен қатар, Ханның үнді теледидарында бірнеше бағдарламасы бар.

Оның әйелі – өміріндегі бірінші және жалғыз әйел. Бірақ қарым-қатынастың басында жастар ата-аналардың наразылығына тап болды. Ғашықтар әр түрлі ұлттар мен діндерге жататындығы кедергі еді. Қуанышқа орай, уақыт өте келе қалыңдықтың әкесі өз батасын береді. Шахрухтың әйелі және үш баласы бар.

Айшавария Рай

Тартымды келбеттен бөлек, ата-анасы да өте құрметті және ауқатты адамдар. Бұл олардың сүйікті қызының жоғары білім алуына мүмкіндік берді. Мумбайдағы беделді колледжде би және музыка сабағы, содан кейін университетте білім алу қыздың шығармашылық мамандықты таңдауына ықпал етті.

Рас, ол бірден актриса болуды ойлаған жоқ. Алғашында Айшвария өзін табысты сәулетші ретінде көрді. Тағдыр оған суреттер мен құрылыс жобаларының орнына жаңа сыйлық дайындады.

Райдың сұлулығы назардан тыс қалмады. 18 жасында оған модельдік агенттікпен бірлесіп жұмыс істеу ұсынылды. Келісім-шарт жасалғаннан кейін көп ұзамай ол сән көрсетілімінде жарқырап, роликтерде ойнады, тіпті Vogue-тің мұқабасына шықты. Бұл даңққа апаратын жарқын жолдың бастамасы ғана еді.

1994 жылы Айшавария «Әлем аруы» байқауында жеңімпаз атанды. Табысқа қарамастан, 1997 жылы бойжеткен сән индустриясынан кинода мансапқа кетуді шешті. Нәтижесінде сыншылар мен көрермендер оның «Мәңгі сендікпін» фильміндегі актерлік шеберлігін жоғары бағалады. Көптеген жанкүйер Райдың экрандағы Салман Кханмен ойнаған дуэтін Болливудтағы ең әдемі жұп деп санайды.

Бірнеше жыл бойы ол әйгілі үнді актері Амитабх Баччанның ұлы Абхишек Баччанмен бақытты ғұмыр кешіп келеді. 2011 жылы ерлі-зайыптылар қызды болды. Кейде баспасөзде отбасындағы келіспеушіліктер туралы сыбыстар жүреді, бірақ ерлі-зайыптылар әлеуметтік желілерде бірлескен фотосуреттерді үнемі жариялап, алып-қашпа сөздерді жоққа шығарады.

Джухи Чавла

Чавла алғашқы үнді көрермендерінің, содан кейін бүкіл әлемнің көңілін таланты мен қоңыр көздерімен баурап алды.

Оның отбасы өнерден алшақ еді. Ата-аналар қарапайым мемлекеттік қызметші ретінде жұмыс істеді. Отбасы мен достарының мазағынан қорыққан қыз актриса болуды армандады. Джухи атақты болу үшін сұлулық сайыстарынан бастады. Оның марапаттарының қоржынында «Үндістан аруы» атағы бар. Бірақ ол киноға түсуге деген құлшынысынан бас тартқан жоқ.

1986 жылы оның қатысуымен алғашқы «Махаббатқа қарай» фильмі бүкіл әлемде жарық көрді. Осы сәттен бастап оған Болливудтағы барлық жолдар ашылды. Әр жаңа фильммен бірге қыздың жанкүйерлерінің саны артты. Нәтижесінде Чавла өз елінен тыс жерде танымал болды. Ол үнді киносын сүйер қазақ қауымына «Құдай біледі», «Жұмақ» және «Ән сал, Радха, ән сал!» фильмдерінен жақсы таныс.

Қазір Джухи жаңа жобаларға сирек қатысады, бірақ оның өмірі әлі де өнермен байланысты. Қазір ол продюсер болып жұмыс істейді. Ол барлық бос уақытын күйеуі мен екі баласына арнайды. Ал күйеуі – табысты бизнесмен. Сүйікті әйелінен басқа оның киноиндустриямен ешқандай байланысы жоқ. Бірақ Джухидің ұлы мен қызы әйгілі ананың ізімен жүріп, актерлік жолды жалғастырғысы келеді.

Еске сала кетсек, Қазақстандық теннисші қыз жаңадан танылып келе жатқан әлемдік жұлдыздардың үздік ондығына енді.

Ең маңызды әрі қызықты жаңалықтарды біздің Telegram арнамыздан оқыңыздар!