Ақмола облысындағы үш айлық сәбидің өлімі: Оқиғаға қатысты тың мәліметтер пайда болды

Ақмола облысындағы үш айлық нәрестенің өліміне қатысты дәрігерлердің үстінен қылмыстық іс қозғалды деп хабарлайды KAZ.NUR.KZ порталы Қазақпаратқа сілтеме жасап.

Ақмола облыстық полиция департаментінің баспасөз қызметінің мәліметінше, нәрестенің өлімі туралы ақпарат 18 қараша күні түскен.

"Бастапқы диагнозы: аспирациялық синдром. Осыған байланысты Қазақстанның Қылмыстық кодексінің 317- бабы 3-бөлігі ("Медициналық немесе фармацевтикалық қызметкердің кәсіби міндеттерін тиісті деңгейде орындамауы") бойынша сотқа дейінгі тергеп-тексеру амалдары басталды", - деді ведомство.

Айта кетейік, 15 қарашада бала шұғыл түрде Облыстық көпбейінді балалар ауруханасына жатқызылған болатын.

"Бастапқы диагнозы: аспирациялық синдром. Өйткені бала ауруханаға ауыр халде жеткізілген. Жансақтау бөлімінде шұғыл ем-дом шаралары жүргізілгеніне қарамастан, шақалақтың өмірін сақтап қалу мүмкін болған жоқ", - деді облыстық денсаулық сақтау басқармасы.

Ведомство мәліметінше, баланың неден шетінегенін сот-медициналық сараптама анықтайтын болады.