"Пирамиданы қазақтар салған": Белгілі жазушы күтпеген мәлімдеме жасады

"Қамшы" порталына тарихқа қатысты мақалаларды жиі жазатын жазушы Мұхамбеткәрім Қожырбайұлы күтпеген мәлімдеме жасады. Ол жер бетіндегі алып пирамидаларды біздің ата-бабаларымыз салған деген тұжырымға келді деп хабарлайды "Қамшы" порталына сілтеме жасаған NUR.KZ.

Жазушы біздің заманымызға дейін бүкіл әлем халқы Қазақ деген елдің құрамында өмір сүрген деп болжайды.

Бұл туралы біраз зерттеу жүргізген қаламгер Мұхамбеткәрім Қожырбайұлы әйгілі ірі пирамидаларды да біздің арғы аталарымыз салдырған деген тұжырымға келіп отыр.

"Бүкіл жер шарының түкпір-түкпірінде алып пирамидалар бар. Соларды салған да біздің аталарымыз. Оған Египет пирамидасының ішіндегі бөлменің қабырғасынан табылған "домбыра мен Қаз Адайдың "тіл таңбасы" толықтай куәлік ете алады", - деді ол өз жазбасында.

Сондай-ақ, жазушы Каирдағы мұражайға қойылған Египет перғауыны Тутанхамонның бала кезіндегі ойыншығы қойдың асығына ұқсайтынын, ал пирамиданың биік шыңы Адай таңбасы "жебеге" сәйкес келетінін айтты.

Ол Құран Кәрімде пирамидаларды салған Перғауындардың "қазық" деп аталғанын да сөз етті.